Protest protiv seksualnog uznemiravanja bivše učenice Gimnazije “Slobodan Škerović” Sare Vujisić, od strane profesora te škole Radomana Čečovića, biće održan u petak ispred škole s početkom u 13 sati, saopštili su organizatori.

Kako je najavljeno na društvenim mrežama, događaj će trajati do 19 sati, a program uključuje blokadu bulevara ispred škole od 13 do 14 sati, dok će u 17:15 sati biti održan glavni skup na kojem će se iznijeti ciljevi protesta.

Organizatori Sara Vujisić i Kosta Mijušković poručuju da je protest mirnog karaktera, uz striktno poštovanje pravila koja zabranjuju konzumaciju alkohola, upotrebu pirotehnike ili bilo kakve oblike nasilja.

– Ovo nije samo borba za pravdu u slučaju seksualnog uznemiravanja, već i jasna poruka da ovakvo ponašanje nema mjesta u obrazovnim ustanovama. Naša škola treba da bude sigurno mjesto za sve učenike i učenice – poručili su organizatori u najavi protesta.

Ovaj skup, kako ističu, ima za cilj podizanje svijesti o problemima seksualnog uznemiravanja u obrazovnim institucijama, ali i širu podršku žrtvama koje se suočavaju s ovakvim oblicima nasilja.

Protest dolazi nakon što su detalji o slučaju postali javni, izazvavši lavinu reakcija na društvenim mrežama i šire. Organizatori apeluju na građane da se pridruže i podrže ovaj čin solidarnosti.