Kafa i čaj mogu biti dio zdrave ishrane, posebno ako se piju bez dodatog šećera. Ipak, stručnjaci upozoravaju da nije važan samo njihov sastav, već i temperatura na kojoj ih konzumiramo.

Prema naučnim istraživanjima, polifenoli iz kafe i crnog čaja imaju antioksidativna i protivupalna svojstva koja mogu doprinijeti smanjenju rizika od pojedinih vrsta raka. Međutim, onkolog dr Mark Ašamala upozorava da ispijanje veoma vrućih napitaka može povećati rizik od raka jednjaka.

Kako objašnjava, redovno izlaganje sluzokože jednjaka visokim temperaturama može izazvati hroničnu iritaciju, upalu i oštećenja ćelija. Vremenom takve promjene mogu povećati rizik od razvoja planocelularnog karcinoma jednjaka.

Međunarodna agencija za istraživanje raka (IARC) napitke toplije od 65 stepeni Celzijusa svrstava među vjerovatno kancerogene za ljude. Zato stručnjaci savjetuju da se kafa ili čaj ostave nekoliko minuta da se ohlade prije konzumiranja.

Jednostavan način da procijenite temperaturu jeste da uzmete mali gutljaj. Ako osjećate peckanje u ustima ili vam je gutanje neprijatno, napitak je i dalje previše vruć.

Osim povećanog rizika od raka, često ispijanje vrelih napitaka može izazvati ezofagitis – upalu jednjaka koja se manifestuje peckanjem, bolom pri gutanju, nelagodnošću u grudima i osjećajem da je hrana zapela u grlu. Ako se tegobe ponavljaju, potrebno je javiti se ljekaru.

Dr Ašamala podsjeća da vreli napici nisu jedini faktor rizika za bolesti jednjaka. Pušenje, konzumiranje alkohola i neliječena gastroezofagealna refluksna bolest (GERB) takođe mogu dovesti do hroničnih oštećenja i povećati rizik od ozbiljnih komplikacija.

Zato stručnjaci imaju jednostavan savjet – sačekajte nekoliko minuta da se kafa ili čaj ohlade. Tako ćete uživati u njihovim zdravstvenim prednostima, a istovremeno smanjiti rizik od oštećenja jednjaka.