Danas vam donosimo provjereni recept za savršene crnogorske uštipke, onako kako ih prave naše babe – bez mnogo mjerenja, ali sa puno duše.

Pripremaju se brzo, a serviraju najčešće za doručak ili večeru, uz sir, kajmak, pršutu ili domaći džem. U nastavku donosimo provjeren recept za pripremu mekanih i ukusnih uštipaka.

Sastojci:

500 g pšeničnog brašna

1 jaje

1 prašak za pecivo

1 kašičica soli

2,5 dl jogurta ili mlake vode

Ulje za prženje

Priprema:

U većoj posudi pomiješati brašno, so i prašak za pecivo.

Dodati jaje i jogurt (ili mlaku vodu), pa sve zajedno izmiješati dok se ne dobije glatka, ujednačena masa. Tijesto treba da bude mekano, ali ne previše rijetko.

Ostaviti tijesto da odstoji 10 do 15 minuta na sobnoj temperaturi.

U dubokoj tavi zagrijati veću količinu ulja. Kada se ulje dobro zagrije, kašikom uzimati tijesto i spuštati ga pažljivo u ulje.

Pržiti uštipke sa obje strane dok ne dobiju zlatno-smeđu boju, vodeći računa da temperatura ulja ne bude previsoka, kako bi se ravnomjerno ispržili iznutra.

Gotove uštipke izvaditi i staviti na papirne ubruse kako bi se odstranio višak masnoće.

Serviranje:

Uštipci se tradicionalno služe topli, uz mliječne proizvode poput sira ili kajmaka, ali odlično se kombinuju i sa slatkim dodacima poput džema ili meda. Mogu biti i dio bogatijeg obroka, u kombinaciji sa suhomesnatim proizvodima.

Napomena:

Iako jednostavni, uštipci zahtijevaju pažnju kod prženja – važno je pogoditi pravu temperaturu ulja i gustinu tijesta. Ovaj recept može se po potrebi prilagođavati, zavisno od ukusa i navika domaćinstva.