Džef Bridžis, dobitnik Oskara, vraća se u digitalni svijet u novom nastavku Diznijeve franšize Tron, pod nazivom “Tron: Ares”, kako izvještava “Deadline”.

Bridžis je započeo svoj put u svijetu Trona davne 1982. godine, glumeći glavnu ulogu kao programer Kevin Flynn, a kasnije se pojavio u nastavku “Tron: Legacy” 2010. godine. Oba filma su postigla značajan komercijalni uspjeh te stekla kultni status među ljubiteljima naučne fantastike.

U nedavnom intervjuu za podcast “Film Comment”, Bridžis je otkrio svoj povratak u svijet Trona.

– Ovog vikenda počinjem sa snimanjem trećeg filma u serijalu Tron. Džared Leto će biti zvijezda trećeg filma. Jedva čekam sarađivati s njim, veliki mi je uzor –  izjavio je Bridžis.

Uz Letoa i Bridžisa, u filmu će se pojaviti i Greta Li, Evan Piters, Hasan Minhaj, Džodi Tarner-Smit, Arturo Kastro, Kameron Monagan i Džillian Anderson. Film će režirati Joakim Roning, poznat po filmovima “Maleficent: Mistress of Evil” i “Pirates of the Caribbean: Dead Men Tell No Tales”.

Priča filma će se fokusirati na Aresa (Leto), visoko sofisticiranog programa koji je poslat iz digitalnog svijeta u stvarni svijet radi opasne misije. Scenario su napisali Džes Vigutov i Džek Torn.

“Tron: Ares” će producirati Leto, Šin Bejli, Džefri Silver, Džastin Springer, Ema Ludbrok, Stiven Lisberger i Rasel Alen. Premijera filma očekuje se 2025. godine.

Za sve one koji žele osvježiti uspomene ili uploviti u svijet Trona, prva dva filma, “Tron” i “Tron: Legacy”, dostupni su na streaming servisu Disney+.