Predsjednik Crne Gore, Jakov Milatović, zajedno s predsjednicom Slovenije, Pirc Musar, svečano je otvorio ESG Adria samit u Tivtu, naglašavajući put ka Evropskoj uniji kao ključnu budućnost Zapadnog Balkana.

Samit, posvećen temama zelene tranzicije, održivog razvoja i odgovornog korporativnog upravljanja, okupio je lidera i stručnjake iz regiona kako bi razmotrili perspektive i izazove održivosti.

U uvodnom panelu pod nazivom “Budućnost našeg regiona”, Milatović i Pirc Musar raspravljali su o održivoj perspektivi zemalja regiona, ističući integraciju u EU kao ključni cilj. Milatović je naglasio važnost održivog razvoja u svijetlu ekoloških, energetskih i ekonomskih kriza, istakavši zelenu ekonomiju, inovacije i održivi turizam kao osnove za dugoročnu ekonomsku stabilnost Crne Gore.

– Pravičnost i jednake mogućnosti moraju biti osnovni principi na kojima gradimo naše društvo – istakao je Milatović, naglašavajući potrebu za korjenitim reformama u obrazovanju, zdravstvu i ekonomskim politikama.

Pirc Musar dodala je da je budućnost Zapadnog Balkana u Evropskoj uniji, te da održivi razvoj mora biti njen temelj. – Državnici rade za naredne generacije, a ne samo za sljedeće izbore – istakla je ona.

Predsjednik države naglasio je važnost dobrog korporativnog upravljanja kao ključnog faktora dugoročnog uspjeha, ističući potrebu za jasnim poslovnim politikama i kvalitetnim zakonskim rješenjima.

Na kraju, zaključio je da samo zajedničkim naporima možemo vratiti povjerenje građana u sistem i privući povjerenje investitora u privatni sektor.